മലയാള ഐക്യവേദി
 
   'ഭരണവും വിദ്യാഭ്യാസവും മലയാളത്തില്‍' എന്ന മുദ്രാവാക്യമുയര്‍ത്തി 2009 നവം. 14,15 തിയതികളില്‍ വടകര നടന്ന സമ്മേളനത്തില്‍ വെച്ച് മലയാള ഐക്യവേദി രൂപൂകരിച്ചു. 2009 ലെ ബിരുദ പുന:സംഘടനയില്‍ മലയാളഭാഷയും സാഹിത്യവും പിന്തള്ളപ്പെട്ടതിനോടുള്ള പ്രതിഷേധമായി മാര്ച്ച് മാസത്തില്‍ ആരംഭിച്ച
കൂട്ടായ്മകള്‍ പൊതുപരിപാടി മുന്‍നിര്‍ത്തി മലയാള ഐക്യവേദി എന്ന സംഘടനയായി മാറുകയായിരുന്നു. ഡോ: പുതുശ്ശേരി രാമചന്ദ്രന്‍, ഡോ: കെ. എം. ഭരതന്‍, പി. പവിത്രന്‍ എന്നിവര്‍ ആദ്യ ഭാരവാഹികള്‍.
സാഹിത്യപഠനത്തെ സൌന്ദര്യാത്മക വിദ്യാഭ്യാസമായി കണ്ട് വിദ്യാഭ്യാസത്തിന്റെ എല്ലാ
തലങ്ങളിലും പഠിപ്പിക്കണമെന്ന കാഴ്ചപ്പാട് മുന്നോട്ടുവെച്ചു. വിജ്ഞാനഭാഷാ വികസനം, കോടതിഭാഷാപ്രശ്നം എന്നിവ പൊതുസമൂഹത്തിനു മുന്നില്‍ കൊണ്ടുവന്നു. ഫെബ്രു. 21 ലോകമാതൃഭാഷാദിനമാണെന്നത് കേരളസമൂഹത്തിന്റെ ശ്രദ്ധയിലേക്ക് കൊണ്ടുവന്നത് മലയാള ഐക്യവേദിയാണ്. 

                                 എസ്. എസ്. എല്. സി. ബുക്കില്‍ നിന്ന് മലയാളത്തില്‍ പേര് എഴുതുന്നത് എടുത്തുകളയുന്നതിനെതിരെയും ഒമ്പതാം ക്ലാസിലെ ഹിന്ദി പാഠപുസ്തകത്തില്‍ നിന്ന്, അതുവരെ മലയാളത്തില്‍ കൊടുത്തിരുന്ന അര്‍ത്ഥം ഇംഗ്ലീഷിലേക്ക് മാറ്റിയതിനെതിരെയും വിജയകരമായ സമരം നടത്തി. 
                    
കടകളുടെ ബോര്‍ഡുകള് മലയാളത്തിലാക്കുക എന്ന ആവശ്യം ഉന്നയിച്ച് തൃശ്ശൂരിലെയും കോഴിക്കോട്ടെയും ആയിരക്കണക്കിന് കടകളില്‍ കയറി പ്രചരണം നടത്തി. 2010 നവംബറില്‍ മലയാളം നിര്‍ബന്ധിത ഒന്നാംഭാഷയാക്കുന്നതിന് സര്‍ക്കാരിന് ഭീമഹര്‍ജി നല്കാനും സെക്രട്ടറിയേറ്റിനു മുന്നില് സമരം സംഘടിപ്പിക്കാനും മലയാള ഐക്യവേദി ആലോചിക്കുന്ന ഘട്ടത്തില്‍ സമാന മുദ്രവാക്യം ഉന്നയിച്ച് മലയാളസമിതിയും മുന്നോട്ടുനീങ്ങുന്നതറിഞ്ഞ് ഐക്യമലയാളപ്രസ്ഥാനം എന്ന പൊതു
കൂട്ടായ്മ രൂപീകരിക്കാനുള്ള തീരുമാനമെടുക്കുകയായിരുന്നു. ഒന്നാംഭാഷാസമരത്തില്‍ മലയാള ഐക്യവേദിയുടെ പ്രവര്‍ത്തകര്‍ സജീവമായി പങ്കാളികളായി. ഹയ‍ര്‍സെക്കന്ററി പ്രവേശനത്തില്‍ പൊതുവിദ്യാലയങ്ങളിലെ വിദ്യാര്‍ത്ഥികള്‍ക്ക് അവസരം നഷ്ടപ്പെടുത്തി സി. ബി. എസ്. ഇ. സ്കൂളിലെ സ്കൂള്‍
പരീക്ഷയെഴുതിയ വിദ്യാര്‍ത്ഥികള്‍ക്ക് മുന്‍ഗണന നല്കുന്നതിനെതിരെ 2012-ല് പ്രത്യക്ഷസമര രംഗത്തിറങ്ങി. 
                        മലയാള ഐക്യവേദിക്ക് ഭരണഭാഷാവേദി, ശാസ്ത്രമലയാളവേദി, സാമൂഹ്യശാസ്ത്ര മലയാളവേദി,
മലയാള മാധ്യമവേദി, മലയാള വിവരസാങ്കേതിക വേദി, മലയാള വിവര്‍ത്തക വേദി, പ്രൈമറിതല മലയാളവേദി, ഹൈസ്കൂള് തല മലയാളവേദി, ഹയര്‍സെക്കന്ററി തല മലയാളവേദി, ബിരുദതല മലയാളവേദി, ബിരുദാനന്തരതല മലയാളവേദി, എന്നിങ്ങനെ വിവിധ വിഷയങ്ങളെ കേന്ദ്രീകരിച്ച് ഉപസമിതികളുണ്ട്. ഈ വിഷയങ്ങളെ സംബന്ധിച്ച് ഒരു ശില്‍പ്പശാല 2010 നവം. 23, 24 തിയതികളില്‍ എറണാകുളം ജില്ലയിലെ കറുകുറ്റിയില് സംഘടിപ്പിക്കുകയും നയം രൂപീകരിക്കുകയുമുണ്ടായി. 2013 ജൂണ്‍ 1, 2 തിയതികളില്‍ പാലക്കാട് മുണ്ടൂരില് മറ്റൊരു പ്രവര്‍ത്തക ക്യാമ്പും സംഘടിപ്പിച്ചു. 
                                   പതിനാല് ജില്ലകളിലും പ്രാദേശിക ഘടകങ്ങളോടു കൂടി സംസ്ഥാനമാകമാനം മലയാള ഐക്യവേദി പ്രവര്‍ത്തിക്കുന്നു. ഇരുപത്തിയഞ്ച് അംഗങ്ങളുള്ള സെക്രട്ടറി തല സമിതി പ്രവര്‍ത്തനങ്ങള്‍ക്ക് നേതൃത്വം നല്കുന്നു. 


ഭാരവാഹികള്‍


 പ്രസിഡന്റ്: എം. വി. പ്രദീപന്‍.
ജന. സെക്രട്ടറി: ആര്‍. ഷിജു.
കണ്‍വീനര്‍:  ഡോ. വി. പി. മാര്‍ക്കോസ്.

അഭിപ്രായങ്ങളൊന്നുമില്ല:

ഒരു അഭിപ്രായം പോസ്റ്റ് ചെയ്യൂ

PLEASE NOTE
അവഹേളനപരവും വ്യക്തിപരവുമായ അധിക്ഷേപങ്ങളും അശ്ലീല പദപ്രയോഗങ്ങളും ദയവായി ഒഴിവാക്കുക. അഭിപ്രായങ്ങൾ മലയാളത്തിലോ ഇംഗ്ലീഷിലോ മംഗ്ലീഷിലോ എഴുതാം.